బోధన్, వెలుగు : నిజామాబాద్ జిల్లా కేంద్రంలో ఈనెల 25న జరిగే 23వ జిల్లా మహాసభను విజయవంతం చేయాలని పీడీఎస్యూ జిల్లా ప్రధాన కార్యదర్శి కర్క గణేశ్ పిలుపునిచ్చారు. ఆదివారం బోధన్ పట్టణంలో విలేకరుల సమావేశంలో ఆయన మాట్లాడారు. ఉస్మానియా యూనివర్సిటీ న్యూక్లియర్ ఫిజిక్స్ గోల్డ్ మెడలిస్ట్ హైదరాబాద్ చేగువేరా కామ్రెడ్ జార్జిరెడ్డి అమరత్వంతో, పీడీఎస్యూ నిర్మాత జంపాల చంద్రశేఖర్ ప్రసాద్ పుట్టిన గడ్డమీద సభ నిర్వహిస్తున్నామన్నారు. జంపాలా చంద్రశేఖర్ ప్రసాద్ ప్రాంగణం (రాజీవ్ గాంధీ ఆడిటోరియం)లో బహిరంగ సభ, పాత కలెక్టరేట్ నుంచి రాజీవ్ గాంధీ ఆడిటోరియం వరకు విద్యార్థి ప్రదర్శన ఉంటుందన్నారు.
పీడీఎస్యూ జిల్లా మహాసభకు పాశం యాదగిరి సీనియర్ జర్నలిస్ట్, కాంపాటి పృథ్వీ, ఎస్. అనిల్, పీడీఎస్యూ రాష్ట్ర అధ్యక్ష, ప్రధాన కార్యదర్శులు వస్తున్నారని తెలిపారు. గత ప్రభుత్వం నుంచి నేటి ప్రభుత్వం వరకు ప్రభుత్వ విద్య సమస్యలతో కొట్టుమిట్టాడుతుందన్నారు. అందరికీ కామన్ విద్య అందించాలన్నారు. ఉచిత విద్య, వైద్యం, ఉద్యోగావకాశాలు కల్పించాలని డిమాండ్ చేశారు. విద్యార్థులు, మేధావులు అధిక సంఖ్యలో సభకు హాజరుకావాలని కోరారు. కార్యక్రమంలో పీడీఎస్ యూ జిల్లా ఉపాధ్యక్షుడు ఎస్కే అషూర్, జిల్లా నాయకులు ఆర్.వినోద్, రెహాన్, గణేశ్,కార్తీక్, శివ,కార్తీక్ పాల్గొన్నారు.
